DYP həftəsonu ilə bağlı sürücülərə müraciət edib

Baş Dövlət Yol Polisi İdarəsi (DYP) həftəsonu ölkənin avtomobil yollarında, xüsusilə paytaxt və bölgələr arasında, həmçinin turizm və istirahət məkanlarına aparan istiqamətlərdə nəqliyyat axınının artacağının gözlənildiyini bildirib və sürücüləri ehtiyatlı olmağa çağırıb.

DYP-nin məlumatına görə, hərəkət intensivliyinin yüksəlməsi yol-nəqliyyat hadisələri riskini artırdığından sürücülərə sürəti yol və hava şəraitinə uyğun seçmək, yorğun və ya səhhətində problem olduğu halda sükan arxasına əyləşməmək, təhlükəsiz ara məsafəsini qorumaq və riskli ötmə manevrlərindən çəkinmək tövsiyə olunub.

Qurum həmçinin sürücülərə səfərə çıxmazdan əvvəl nəqliyyat vasitələrinin texniki vəziyyətini yoxlamağı və yol hərəkətinin təşkili vasitələrinin tələblərinə ciddi əməl etməyi tövsiyə edib.

Piyadalara isə yolu yalnız müəyyən edilmiş keçidlərdən keçməyi, yolu keçərkən mobil telefondan istifadə etməməyi və xüsusilə gecə saatlarında daha diqqətli olmağı tövsiyə edib.

"Yollarda təhlükəsizlik hər bir hərəkət iştirakçısının məsuliyyətli davranışından asılıdır", - məlumatda deyilir.