Özünü prokurorluq əməkdaşı kimi qələmə verən şəxs həbs olunub

Mingəçevir şəhərində özünü prokurorluq əməkdaşı kimi təqdim edərək dələduzluq etməkdə təqsirləndirilən şəxs barəsində məhkəmənin qərarı ilə həbs qətimkan tədbiri seçilib.

Baş Prokurorluğun yaydığı məlumata görə, Mingəçevir şəhər prokurorluğunda aparılan istintaqla Vasif Haqverdiyevin özünü Mingəçevir və Tərtər rayon prokurorluqlarının əməkdaşı kimi təqdim edərək ayrı-ayrı şəxslərin etibarından sui-istifadə etməklə onların pul vəsaitlərini ələ keçirməsinə əsaslı şübhələr müəyyən edilib.

İstintaq materiallarına əsasən, təqsirləndirilən şəxs bir sıra məktəbəqədər təhsil müəssisələrinin rəhbərlərinə barələrində yoxlamalar aparılacağı və maliyyə-təsərrüfat fəaliyyətlərinin araşdırılacağı barədə həqiqətə uyğun olmayan məlumatlar verib, bununla da onların hüquqlarının pozulmasına və prokurorluq orqanlarının nüfuzuna zərər vurub.

Toplanmış sübutlar əsasında V.Haqverdiyevə Cinayət Məcəlləsinin 178.2.2-ci (təkrar dələduzluq) və 310-cu (vəzifəli şəxsin səlahiyyətlərini mənimsəmə) maddələri ilə ittiham elan olunub və məhkəmənin qərarı ilə barəsində həbs qətimkan tədbiri seçilib.

Cinayət işi üzrə istintaq davam etdirilir.