Bakı metrosundan ötən gün 605 min sərnişin istifadə edib

Sentyabrın 15-də Bakı metropolitenindən 605 081 sərnişin istifadə edib.

“Bakı Metropoliteni” QSC-nin məlumatına görə, bu göstərici avqust ayında qeydə alınan ən yüksək sərnişindaşıma göstəricisindən 9,3% çoxdur. Avqustun pik günündə metrodan 548 751 sərnişin istifadə edib.

Şirkət bildirib ki, yeni tədris ilinin ilk günündə sərnişin sayının artması metronun paytaxtın nəqliyyat sistemində mühüm rolunu göstərir.

Hazırda xətlərin ayrılması layihəsi çərçivəsində işlər davam etdirilir. Layihə başa çatdıqdan və xətlər tam ayrıldıqdan sonra qatarlar arasındakı intervalların azaldılması, sərnişinlərin daha rahat və sürətli daşınmasının təmin edilməsi nəzərdə tutulur.