Bakının bir sıra küçələrində bu gündən hərəkət məhdudlaşdırılacaq

Bu gün saat 21:00-dan etibarən Bakının Binəqədi və Nərimanov rayonlarının bir sıra küçələrində aparılacaq təmir və yol hərəkətinin təşkili işləri ilə əlaqədar nəqliyyat vasitələrinin hərəkətinə qısamüddətli məhdudiyyətlər tətbiq olunacaq. Bu barədə Azərbaycan Avtomobil Yolları Dövlət Agentliyi (AAYDA) məlumat yayıb.

Bildirilib ki, Binəqədi rayonunda Şövkət Məmmədova küçəsinin Çingiz Aytmatov küçəsi ilə kəsişməsindən Süleyman Sani Axundov küçəsi ilə kəsişməsinədək olan hissəsində təmir işləri aparılacaq. Həmin ərazidə nəqliyyat vasitələrinin hərəkəti məhdudlaşdırılacaq.

Bundan əlavə, Zaur Nudirəliyev küçəsinin Ziya Bünyadov prospekti ilə kəsişməsindən Əcəmi Naxçıvani küçəsi ilə kəsişməsinədək olan hissəsində də təmir işləri ilə əlaqədar hərəkət məhdudlaşdırılacaq.

Nərimanov rayonunda isə Koroğlu Rəhimov küçəsi ilə Təbriz küçəsinin kəsişməsində hərəkət sxemi dəyişdiriləcək. Bu məqsədlə ayırıcı zolağın bir hissəsi ləğv olunacaq və ərazidə nəqliyyat vasitələrinin hərəkətinə qismən məhdudiyyət tətbiq ediləcək.

AAYDA-nın məlumatına görə, məhdudiyyətlər görülən işlər başa çatanadək qüvvədə olacaq.

Sürücülərdən alternativ marşrutlardan istifadə etmələri və ərazidə aparılan işləri nəzərə almaları xahiş olunub.