Azərbaycanda ürək xəstəliklərindən ölənlərin sayı artıb- STATİSTİKA

Azərbaycanda ürək-damar xəstəliklərindən ölənlərin sayı 2025-ci ildə əvvəlki illə müqayisədə 266 nəfər artaraq 33 555 nəfərə çatıb. Bu barədə Dövlət Statistika Komitəsi Anews.az-ın sorğusuna cavab olaraq bildirilib.

Səhiyyə Nazirliyinin məlumatlarına görə, 2024-cü ildə ölkədə ürək-damar xəstəliklərindən 33 289 nəfər ölüb. Beləliklə, 2025-ci ildə ölüm halları illik müqayisədə 0,8% artıb.

Ürək-damar xəstəlikləri Azərbaycanda əsas ölüm səbəblərindən biri olaraq qalır. 

Həkimlər ürək-damar xəstəliklərinin yaranmasında bir neçə risk faktorunun rol oynadığını bildirirlər. Səhiyyə Nazirliyinin kardioloqu Leyla Quliyevanın sözlərinə görə, əsas risk faktorları arasında qeyri-sağlam qidalanma, piylənmə, şəkərli diabet, qanda xolesterinin yüksək olması, siqaret çəkmə, arterial hipertenziya, fiziki hərəkətsizlik və stress yer alır. O, irsi faktorun da əhəmiyyətli rol oynadığını qeyd edib.

Mütəxəssislərin fikrincə, ürək-damar xəstəliklərinin ağırlaşmasının qarşısının alınmasında risk faktorlarının vaxtında müəyyənləşdirilməsi və nəzarətdə saxlanılması mühüm əhəmiyyət daşıyır. Səhiyyə Nazirliyinin Kardiologiya İnstitutunun mütəxəssisləri xüsusilə yüksək qan təzyiqi, xolesterin və şəkərli diabet kimi göstəricilərin nəzarətdə saxlanılmasının vacibliyini vurğulayırlar.

Nazirliyin məlumatlarına əsasən, ürək-damar xəstəliklərinin qarşısının alınması üçün sağlam qidalanma, fiziki aktivlik və zərərli vərdişlərdən uzaq durmaq əsas profilaktik tədbirlər sırasında göstərilir.

Aytac Zeynalova