Adi vətəndaş üçün təyyarə ilə səyahət əlçatan olmalıdır - deputat

Azərbaycanda aviareyslərin sayının artırılması və sərnişinlər üçün daha münasib qiymətli biletlərin əlçatan olması vacibdir.Bunu deputat Razi Nurullayev Milli Məclisdə çıxışı zamanı bildirib.

“Adi vətəndaş üçün təyyarə ilə səyahət əlçatmaz seçimə çevrilməməlidir”, -  deputat vurğulayıb.

Onun sözlərinə görə, aviasiyanın inkişafı yalnız uçuşların və sərnişinlərin sayının artması ilə deyil, insanların təyyarə ilə səyahət imkanlarının genişlənməsi ilə də ölçülməlidir. Vətəndaşlar ailə ziyarəti, təhsil, müalicə və işgüzar səfərlər üçün münasib qiymətlərlə uçmaq imkanına malik olmalıdırlar.

Nurullayev marşrutların genişləndirilməsini, rəqabət imkanlarının artırılmasını və qiymət siyasətində sərnişinlərin maraqlarının daha çox nəzərə alınmasını vacib sayıb.

“Bu gün əlçatanlıq məhdud sayda ucuz biletin mövcudluğudur”, - deputat qeyd edib və daha çox insanın münasib qiymətlərlə səyahət edə bilməsi üçün imkanların artırılmasına çağırıb.

Deputat Əmək Məcəlləsinə və “Aviasiya haqqında” qanuna təklif olunan dəyişiklikləri dəstəklədiyini də bildirib. O, uçuş heyətinin iş və istirahət vaxtının Beynəlxalq Mülki Aviasiya Təşkilatının standartlarına uyğun tənzimlənməsini aviasiyanın xüsusiyyətlərini nəzərə alan addım kimi qiymətləndirib.

Gülnar Nazimqızı