Azərbaycan qara kürü ixracını iki dəfə artırmağı hədəfləyir

Azərbaycan 2026-cı ilin noyabrınadək 900 kiloqram qara kürü ixrac edib. İlin sonunadək bu göstəricinin təxminən iki dəfə artacağı gözlənilir. Bu barədə Balıqçılıq və Akvakultura Mərkəzinin direktoru Ceyhun Əliyev məlumat verib.

O bildirib ki, Azərbaycanın akvakultura üzrə əsas ixrac potensialı nərə balığı və qara kürü istehsalı ilə bağlıdır. Dövlət Proqramında ixracın iki dəfə artırılması hədəfi müəyyən edilib.

Əliyevin sözlərinə görə, ölkədə nərə yetişdirən təsərrüfatlar getdikcə qapalı su dövriyyəsi (RAS) sistemlərinə keçir. Bu texnologiya temperaturun idarə olunmasına və balıqların yetişdirilməsinin sürətləndirilməsinə imkan verir.

Mərkəzin direktoru qeyd edib ki, hazırda Azərbaycanda akvakultura istehsalı nohur, axar su, qapalı və qismən dövriyyəli su sistemləri, eləcə də qəfəs təsərrüfatları olmaqla dörd model əsasında inkişaf edir.

O, həmçinin forel istehsalının artırılması imkanlarının olduğunu, xüsusilə iri forelə tələbatın hazırda əsasən idxal hesabına ödənildiyini vurğulayıb. Dövlət dəstəyi mexanizmləri ilə növbəti illərdə yerli forel istehsalının əhəmiyyətli dərəcədə artırılması planlaşdırılır.