Startaplar üçün vergi güzəştlərinin müddəti 7 ilədək artırılacaq

Azərbaycanda startap şəhadətnaməsi almış sahibkarlar üçün vergi güzəştlərinin müddəti 2027-ci ildən üç ildən yeddi ilədək artırılacaq. Bundan başqa, dövlətin payı 50 faizdən çox olan texnologiya parkı rezidentləri üçün 20 illik əlavə vergi güzəştləri paketi tətbiq olunacaq. Bunu iqtisadiyyat nazirinin müavini Azər Bayramov bildirib.

Onun sözlərinə görə, hazırda startap şəhadətnaməsi almış sahibkarların sayı 340-ı ötüb. Yeni güzəştlər innovativ sahibkarlığın və texnologiya sektorunun inkişafını dəstəkləməyə yönəlib.

A.Bayramov qeyd edib ki, 2027-ci ildən texnologiya parklarında fəaliyyət göstərən və dövlət payı 50 faizdən çox olan rezidentlər mənfəət, əmlak və torpaq vergilərindən azad ediləcək. Güzəştlər sosial sığorta ödənişlərini və işçilərin əməkhaqlarına tətbiq olunan gəlir vergisini də əhatə edəcək. Bu imkanların müəyyən ixrac şərti ilə təqdim olunması nəzərdə tutulur.

Nazir müavini sənaye zonalarının fəaliyyətinə də toxunub. O bildirib ki, hazırda ölkədəki 10 sənaye parkı və altı sənaye məhəlləsində 190-dan çox layihə qeydiyyatdan keçib, təxminən 12 min iş yeri yaradılıb.

Onun sözlərinə görə, 2026-cı ilin ilk doqquz ayında qeyri-neft-qaz sənayesində istehsalın təxminən beşdə biri, ixracın isə dörddə biri sənaye parkları və məhəllələrinin payına düşüb.

Bayramov Ələt Azad İqtisadi Zonasında gələn ildən yeni dəstək mexanizmlərinin tətbiq ediləcəyini də açıqlayıb. Belə ki, zonada istehsal olunan və təsdiq edilmiş siyahıya daxil edilən Azərbaycan mənşəli məhsulların ən azı yarısı ixrac edildiyi halda, qalan hissəsinin ölkəyə gömrük rüsumları ödənilmədən gətirilməsinə imkan yaradılacaq.

O, həmçinin vençur və qrant fondları üçün hüquqi çərçivənin yaradıldığını bildirib. Bu mexanizmlərin sahibkarlara layihələrini bank kreditləri ilə yanaşı, investor kapitalı hesabına maliyyələşdirmək imkanı verəcəyi qeyd olunub.

Nazir müavininin sözlərinə görə, Azərbaycanın Biznesin İnkişafı Fondunun xətti ilə 2026-cı ilin ilk 10 ayında 110-dan çox gənc sahibkara 6 milyon manatdan artıq kredit ayrılıb. Vəsaitlər sənaye istehsalı, kənd təsərrüfatı, xidmət və turizm sahələrində layihələrə yönəldilib.