“Azərişıq”, “Azərsu”, “AZAL” özəlləşdirilməlidir – EKSPERTLƏR

 

 

Natiq Cəfərli  

İqtisadçı ekspert Natiq Cəfərli ANN.Az-a açıqlamasında dövlətin bir çox qurumlarının özəlləşdirilməyə ehtiyacı olduğunu deyib: ""Azərişıq”, "Azərsu”, "AZAL”, "Xəzər Dəniz Gəmiçiliyi” və s. bu kimi iri dövlət qurumlarının özəlləşdirilməsi mütləqdir. Uzun müddət dotasiya almaqla ayaq üstdə qalan bu qurumlar büdcəyə böyük yükdürlər. Fikrimcə, yaxın gələcəkdə bu kimi təşkilatların özəlləşdirilməsinə baxılacaq. Əslində, bu qurumlar çoxdan özəlləşdirilməli idi”.

Ekspert hazırkı şəraitdə özəlləşdirməyə getməyin o qədər də asan olmayacağını bildirib: "İndiyə qədər özəlləşdirilmiş qurumlar çalışmalıydılar ki, xarici ölkələrin Azərbaycana yatırım etməyə maraqları olsun. Bu işə indi başlanılsa,  xeyli vaxt gedəcək. Lakin xarici investorların cəlb edilməsi çox vacibdir”. 

Natiq Cəfərli daha sonra özəlləşdirmənin mənfi və müsbət tərəflərinə toxunub: "Müsbət tərəfi odur ki, büdcəyə gələn vəsaitin həcmi artacaq. Yaxşı inkişaf etməyən şirkətlərin işlərində canlanmalar olması məsələsi gündəmə gələcək. Mənfi tərəfi odur ki, sosial məsələlərin həllində diqqətli olmaq lazımdır. Çünki hər hansı bir xarici investor ölkəyə gəldikdə ilk növbədə xərclərinin optimallaşdırılması, azaldılmasını düşünəcək”.   

 

 

Azər Mehdiyev 

İqtisadçı Azər Mehdiyev hesab edir ki, Azərbaycanda tam və natamam özəlləşdirilməyə ehtiyacı olan dövlət müəssisələri var: "Kommunal sektordan olan "Azərsu”, "Azərişıq”, "Azəriqaz”, "Azəristiliktəchizat” və s. qurumlar var ki, bunların hamısı uzunmüddətli idarə etməyə verilə bilər. Bunun təcrübəsi Azərbaycanda mövcud olub. "Barmek” şəbəkəsini misal göstərə bilərik. Sadalanan qurumların hamısı özəlləşdirilərsə, büdcədə vəsaitin həcmi daha da artar. Həmçinin bununla yanaşı ölkəyə xarici investorların gəlməsi hallarında artım müşahidə olunar”.

Ekspert daha sonra bəzi qurumların özəlləşdirilməsini və ya ümumiyyətlə, satışa çıxarılmasının vacib olduğunu diqqətə çatdırıb: "Vaxtilə neftkimya müəssisələri Dövlət Neft Şirkətinə birləşdirildi. Dövlət Neft Şirkəti ilə "AzərKimya” İstehsalat Birliyi arasında olan borcların və ya gizli subsidiyalaşma kanallarının bağlanması üçün idi”. 

Yanvarın 18-də prezident İlham Əliyevin yanında iqtisadi və sosial məsələlərin həlli ilə bağlı növbəti müşavirə keçirilib. Müşavirədə ölkə başçısı geniş özəlləşdirmə işlərinin aparılmasından və bunun üçün artıq göstərişlərin verilməsindən danışıb: "Biznes mühitini yaxşılaşdırmaq və iqtisadi canlanmanı sürətləndirmək üçün mütləq geniş özəlləşdirmə proqramı həyata keçirilməlidir. Bu proqram tam şəffaf keçirilməlidir, beynəlxalq ekspertlər bu işə cəlb olunmalıdır. Yerli və xarici investorlar üçün elə şərait yaratmalıyıq ki, onlar böyük maraqla, həvəslə vəsait qoysunlar”.