Stiqlits: "FED-in siyasəti qeyri-bərabərliyi artırıb"

 

"APA-Economics" xəbər verir ki, bunu "Business Insider" nəşrinə müsahibəsində məşhur amerikalı iqtisadçı, Nobel mükafatı laureatı Cozef Stiqlits deyib.

 

Neoklassik iqtisadiyyatın və monetarizmin sərt tənqidçisi kimi tanınan C. Stiqlits bildirib ki, C. Yellen rəhbərlik etdiyi tənzimləyicinin siyasəti nəticəsində qeyr-bərabərliyin artmasına işarə edən ilk FED rəhbəri kimi tarixə düşəcək: "Düşünürəm ki, FED-in siyasəti, xüsusilə QE proqramı ilə bağlı atdığı addımlar ABŞ-da qeyri-bərabərliyin artmasına səbəb olub. Uçot dərəcəsi 0% səviyyəsinə endiriləndə, bu, ilk növbədə pensiyaçılara təsir edir. Baxmayaraq ki, FED-in belə bir niyyəti olmayıb, QE proqramı qeyri-bərabərliyin artmasına səbəb oldu. Hazırda isə biz ciddi debatların şahidiyik. Bir tərəfdən "şahin"lər (uçot dərəcəsinin artırılmasının tərəfdarları - red.) inflyasiya ilə bağlı narahatlığını ifadə edir, digər tərəfdən bir qrup şəxs işsizliyin səviyyəsindən narahatdır. Məncə Yellen sonunculardandır. Ümumilikdə, o, "şahin"lərlə məsafə saxlayaraq yaxşı işlər görüb. Bunun nəticəsi kimi, cəmi bir faiz artımı olub. ABŞ iqtisadiyyatının indiki vəziyyətinə nəzər salsaq görərik ki, inflyasiya riski olduqca uzaqdadır. Amma işsizliyin səviyyəsi ilə bağlı vəziyyət fərqlidir. Fikrimi izah edim. Məsələnin kökü ondadır ki, bir çox insanlar işsizliyin səviyyəsi ilə bağlı göstəricilərə, yəni 4 və ya 5%-ə baxaraq sual verirlər: "Məgər bu yaxşı göstərici deyil?" Bu sualın cavabı budur: əmək bazarı zəif olaraq qalır. Sübut? Əmək haqları inflyasiya ilə güclə ayaqlaşır. Bununla yanaşı, əməkqabiliyyətli əhalinin sayına nisbətdə işləyənlərin sayı kifayət qədər deyil. Gizli işsizliyin səviyyəsi isə böyükdür. Bundan başqa, qismən məşğul olanların sayı da çoxdur. Bütün bunlar onu deməyə əsas verir ki, Yellen asan olmayan siyasət aparır".