Manata daha bir ZƏRBƏ

Belə ki, ölkəyə pul baratlarının həcmi ötən ilin eyni dövrü ilə müqayisədə 34,7%, 2014-cü ilin ilk 3 rübünə nisbətən isə 49,4% azalıb. Ölkəyə daxil olan pul köçürmələrinin azalmasının səbəbi, Azərbaycanla tərəfdaş dövlətlərdə iqtisadi aktivliyin zəif olması ilə izah edilir.

Azərbaycana daxil olan pul köçürmələri necə artırılmalıdır?

 

İqtisadçı ekspert Cəfər İbrahimli ANN.Az-a açıqlamasında, ölkəyə daxil olan pul köçürmələrinin azalmasının ilk zərbəni milli valyutaya vurduğunu deyib:

"Vəsaitlərin ölkəyə daxil olmasından söhbət gedirsə, ilk addım kimi qısamüddətli fondlar vasitəsilə xüsusilə, dövlət və ya özəl sektor şirkətlərinin xarici bazarlardan vəsait (avrobondlar vasitəsilə) cəlb edilməlidir. Bununla yanaşı, böyük banklardan götürülən "sindikat kredit”ləri vasitəsilə ölkəyə vəsait daxil ola bilər. Hesab edirəm ki, Maliyyə Nazirliyinin xaricdə böyük rəqəmdə avrobond yerləşdirib ölkəyə vəsait gətirmə imkanları var. İkinci addım, real sektora yönələn xarici şirkətlərin investisiyalarıdır. Hazırki iqtisadi vəziyyətə görə, (reytinq məsələləri, şirkətlərin, bankların vəziyyətinə görə) bu biraz çətin görünür. Amma bu addım da xaricdən ölkəyə pul köçürülməsini artıran amillərdəndir. Bundan başqa, fiziki şəxslərin daha çox xırda həcmdə, xüsusilə, Azərbaycandan kənarda işləyənlərin ölkəyə pul göndərmələri, gətirmələri bu duruma az da olsa, müsbət təsir göstərir. Sadaladığım variantlar mövcuddur. Daha çox vəsaitə, valyutaya ehtiyac varsa, ilkin variantlar üzərində işləmək lazımdır”, - deyə iqtisadçı əlavə edib.  

Qeyd edək ki, 2016-cı ilin ilk 9 ayı ərzində xaricdən ölkəyə 586 milyon dollar məbləğində pul köçürmələri olub. Bu rəqəm ötən ilin anoloji dövründə 897 milyon, 2014-cü ildə isə 1 milyard 159 milyon dollar təşkil edib.