“Qara bazar”da niyə dollar qıtlığı yaranmır?

 

Modern.az xəbər verir ki, iqtisadçı Vüqar Bayramov bunu bankların "dolalr artıqlığı” ilə əlaqələndirib:

"Deməli, "valyuta artıqlığı” olan banklar yenidən dollar alaraq tələb yaratdılar. "Valyuta artıqlığı” sadəcə termindir, əslində alqı-satqı inzibati yolla məhdudlaşdırılır.

Maraqlıdır ki, bankların əksəriyyəti vətəndaşlara dollar satmır, onlardan bəziləri hətta dollar da almır, amma hər hərraca gedib dollar alıb manatın kursunu aşağı salıb ofislərinə qayıdırlar.

İnanmaq istərdim ki, banklar dollarları süvener kimi saxlamırlar. Çünki əslində, süvener kimi saxlasaydılar, o zaman "qara bazar”da da dollar qıtlığı olardı”.

V.Bayramov Mərkəzi Bankın "qara bazar”a dollar çıxarması məsələsinə də münasibət bildirib:

"Mərkəzi Bank deyir ki, banklar "qara bazar”a dollar vermilər. Belə anlaşılmırmı  "qara bazar” artıq dolları birbaşa hərraclardan alır? Çünki dollar emissiya hüququ ABŞ-ın Federal Ehtiyatlar Sistemindədir, "qara bazarımızın” hələlik elə hüququ yoxdur. Onsuz da hərraclar da qapalı keçirilir, orada kimlərin dollar aldığını Mərkəzi Bank ictimaiyyətə açıqlamır.

Maraqlıdır ki, hamı "qara bazar”dan danışır. Amma nə Mərkəzi Bank, nə də Maliyyə Bazarlarına Nəzarət Palatası müəyyənləşdirmir ki, həmin bazara pul haradan və necə daxil olur. Və ya müəyyənləşdirsələr də real addımlar atmaq istəmir. Amma nə qədər ki, "qara bazar” fəaliyyətini genişləndirəcək o qədər hərraclarda dollara tələb yüksək olaraq qalacaq və manat dəyər itirəcək”.