ACE platformasının tikintisinin 80%-i bitib - BP AZERBAİJAN

Azərbaycanın ən böyük neft yatağı olan Azəri-Çıraq-Günəşli (AÇG) neft yatağında 300 milyon barrel ekvivalentində əlavə neft hasil etmək üçün nəzərdə tutulan ACE platformasının tikinti işlərinin 80% başa çatıb. Platformanın dayaq blokunun tikintisi tamam bitib, üst tikililər üzrə tikinti işlərinin isə 95% başa çatıb. Bunu BP Azərbaycan şirkətinin ACE tikintisi üzrə baş meneceri Nil Filips (Neal Phillips) bildirib. 


Onun sözlərinə görə, yeni platforma hazırda AÇG-da mövcud olan Mərkəzi və Şərqi Azəri platformaları arasında  dənizin təxminən 140 metr dərinliyində yerləşdiriləcək.


Platformanın üst tikililərinin tikintisinin 95% bitib. Yaşayış blokunun tikintisi isə tam başa çatıb. Platformada 167 nəfərin yaşayıb işləyəcəyi mümkün olacaq.


"Yeni quyuların sayını artırmaq üçün AÇG-də yeni qazma mərkəzi yaradılacaq. Bu platformanın tikintisindən sonra AÇG-də mövcud platformalardan maili qazma nəticəsində əmələ gələn çətinliklər azaldılacaq və yataqda aktiv quyuların sayı artacaq”, -  Filips bildirib. 


Platformanın quyu sahəsində 48 quyu şaxtası quraşdırılacaq. Platformada hasil ediləcək neft 30 düymlük kəmərlə Sənqaçal terminalına ixrac ediləcək. ACE qaz, neft və su ixrac boru kəmərinə qoşulacaq.  


Filipsin sözlərinə görə, suyun 137 metr dərinliyində quraşdırılacaq dayaq blokunun hündürlüyü 153 metr, çəkisi 16.000 tondur. 


"Dayaq blokunu dənizə aparacaq STB-1 barjasında modifikasiya işləri bitən kimi, yəni 2023-cü ilin birinci rübündə platformanı dənizə yola salmağı planlaşdırırıq”, - Filips vurğulayıb. 


Onun sözlərinə görə, platformanı idarə etmək üçün SƏnqəçal terminalında idarəetmə mərkəzi yaradılacaq. Bu məqsədlə terminalda nəzərdə tutulan dəyişikliklərin 97% bitib. 

N.Təbrizli

www.anews.az