Azərbaycanda “*.baku” domeni yaradıla bilər

Bu məsələ 2015-ci ildə həll olunacaq.

Azərbaycanın milli “*.az” domeni administratoru olan “İntrans” şirkəti “*.baku” domeninin ICANN (internetdə domen adları və zonaların verilməsini həyata keçirən təşkilat – Internet Corporation for Assigned Names and Numbers) korporasiyasının qeydiyyatdan keçirilməsi məsələsinə 2015-ci ildə baxmasını istisna etmir.

ANN.Az ICTnews-a istinadən xəbər verir ki, İCANN-dən verilən məlumata əsasən, hazırkı mərhələdə “*.baku” yuxarı səviyyəli domeninin qeydiyyatdan keçirilməsi  qeyri-rentabel bir layihədir.

Hazırda ICANN yüksəksəviyyəli domenlərin qeydiyyatının ilkin mərhələsini həyata keçirir və bu mərhələdə “*.baku” domeninin qeydiyyat məsələsinin  müzakirə edilməsi üçün ICANN-a 185 min dollar tələb olunur, domenin “News gTLD” proqramı çərçivəsində qeydiyyatdan keçirilməsi isə 500 min dollara başa gələ bilər, bu isə iqtisadi nöqteyi-nəzərdən sərfəli layihə deyil.  

“İntrans” şirkəti bu məsələni 2015-ci ildə yenidən nəzərdən keçirə bilər, çünki növbəti mərhələdə bunu həyata keçirmək daha səmərəli olar.

“Bütün bunlara baxmayaraq, dövlət imici nöqteyi-nəzərindən layihənin həyata keçirilməsinə maraq göstərdiyi halda gələn il bunun həyata keçirilməsi mümkündür. Onu da qeyd etmək lazımdır ki, domenin təhlükəsizliyi haqda narahat olmağa dəyməz, çünki “*.baku” domeni coğrafi adla bağlı olduğu üçün digər ölkə və fərdi şəxs tərəfindən qeydiyyatdan keçirilə bilməz”, - deyə şirkətdə bildiriblər.

ANN.Az