Azərbaycanda 5 ayda vətəndaşlara 91 milyon manatdan çox ƏDV qaytarılıb

Bu ilin yanvar-mayında Azərbaycanda fiziki şəxslərə 91 milyon manatdan çox əlavə dəyər vergisi (ƏDV) məbləği geri qaytarılıb. Bu barədə məlumatı İqtisadiyyat Nazirliyi yanında Dövlət Vergi Xidməti yayıb.

Məlumata görə, 78,3 milyon manat pərakəndə ticarət və ictimai iaşə obyektlərindən alınan mallara (neft və qaz məhsulları, avtomobillər, alkoqollu içkilər və tütün məmulatları istisna olmaqla), habelə özəl tibb müəssisələrinin və fiziki şəxslərin göstərdiyi xidmətlərə görə ödənilən ƏDV-nin geri qaytarılması çərçivəsində istehlakçılara ödənilib.

Bundan əlavə, “ƏDV geri al” layihəsinin genişləndirilməsi nəticəsində fiziki şəxslərə ölkə daxilində bina tikintisi fəaliyyəti ilə məşğul olan şəxslərdən nağdsız qaydada alınmış yaşayış və qeyri-yaşayış sahələrinə görə ödənilən ƏDV-nin qismən qaytarılması prosesi də davam edir.

Son 5 ayda bu istiqamətdə qaytarılan ƏDV məbləği 12,8 milyon manat təşkil edib.

N.Təbrizli