bp-nin Azərbaycan, Gürcüstan və Türkiyə üzrə yeni regional prezidenti təyin olunub

bp şirkəti elan edib ki, Ciovanni Kristofoli (Giovanni Cristofoli) 2025-ci il oktyabrın 1-dən etibarən Azərbaycan, Gürcüstan və Türkiyə (AGT) üzrə yeni regional prezident vəzifəsini icra edəcək. O, bp-nin Bakıdakı ofisində fəaliyyət göstərəcək.

Hazırda Kristofoli bp-nin texniki həllər bölməsinin baş vitse-prezidentidir və şirkətin upstream, emal, aşağı karbonlu enerji və birgə müəssisə bizneslərinə xidmət göstərən qlobal təşkilatına rəhbərlik edir. Onun rəhbərliyi ilə bp texniki xidmətlərin, sualtı işlərin, avadanlıqların bütövlüyü və davamlılığı kimi sahələrin transformasiyasını həyata keçirib.

Kristofoli bu vəzifədə 2017-ci ilin aprelindən AGT regionuna rəhbərlik edən Qəri Counzu əvəz edəcək. Qərinin gələcək vəzifəsi ilə bağlı məlumat bp tərəfindən daha sonra açıqlanacaq.

bp-nin baş icraçı direktoru Marri Aukinkloss Kristofolini "qlobal enerji sənayesində zəngin təcrübəyə malik lider" adlandıraraq onun strateji baxış, əməliyyat mükəmməlliyi və transformasiya bacarıqlarını önə çəkib.

Aukinkloss həmçinin Gəri Counza səkkiz il ərzində AGT regionundakı biznesə rəhbərliyinə görə təşəkkürünü bildirib. O, Bakıda bu ay elan edilən beş yeni layihənin bp-nin regiondakı uzunmüddətli tərəfdaşlığına sadiqliyinin göstəricisi olduğunu vurğulayıb.

N.Tebrizli