Azərbaycan idxal mallarının bildiriş prosedurunu dəyişib

Azərbaycan İqtisadiyyat Nazirliyi idxal edilən mallarla bağlı məlumat forması üzrə prosedurları yeniləyib və formanın təqdim edilməsi qaydasını genişləndirib. Müvafiq qərarı nazir Mikayıl Cabbarov imzalayıb.

Nazirliyin Kollegiyasının dəyişdirdiyi qərara əsasən, neft-qaz sektorunda fəaliyyət göstərənlər, dövlət sektoruna aid edilənlər və “Yaşıl dəhliz” buraxılış sistemindən istifadə edən vergi ödəyiciləri istisna olmaqla, digər bütün vergi ödəyiciləri idxal malları barədə məlumat formasını elektron qaydada təqdim etməli olacaq. Forma Dövlət Vergi Xidmətinin informasiya sistemindəki elektron kabinet vasitəsilə doldurulub vergi orqanına göndəriləcək.

Qərarın adı da genişləndirilib və bundan sonra “idxal ediləcək mallar barədə məlumat forması və təqdim edilmə qaydası” ifadəsini əhatə edəcək.

Nazirliyin Hüquq şöbəsinə sənədin 3 gün ərzində Ədliyyə Nazirliyinə göndərilməsi və Hüquqi Aktların Dövlət Reyestrinə daxil edilməsi üçün zəruri tədbirləri görmək tapşırılıb.