“Hidro-3” layihəsi beynəlxalq karbon bazarına daxil olub – Azərbaycanın ilk karbon kreditləri

 SOCAR Trading və AzərEnerji ASC-nin əməkdaşlığı çərçivəsində Laçın rayonunda yerləşən “Mirik” və “Qaraqışlaq” kiçik su elektrik stansiyalarını əhatə edən “Hidro-3” layihəsi beynəlxalq karbon bazarına daxil olub.

Layihə  2025-ci il mayın 28-də dünyanın aparıcı karbon sertifikatlaşdırma qurumlarından biri olan Gold Standard tərəfindən qeydiyyata alınıb. 2026-cı il  yanvarın 28-də isə “Hidro-3” layihəsi üzrə karbon kreditləri rəsmi şəkildə təqdim edilib.

Bu, Azərbaycanın bərpa olunan enerji mənbələri üzrə əldə etdiyi ilk beynəlxalq karbon kreditləri hesab olunur.

Məlumata görə, karbon kreditləri 2024-cü ilin aprelindən 2025-ci ilin avqustunadək olan dövrü əhatə edir və ümumi həcmi 10 745 karbon vahidi təşkil edir. Bu göstərici layihə çərçivəsində istixana qazı emissiyalarının azaldılmasına real və ölçülə bilən töhfə verildiyini təsdiqləyir.

Ekspertlərin qiymətləndirməsinə görə, “Hidro-3” layihəsinin beynəlxalq karbon bazarına çıxışı Azərbaycanın yaşıl enerji strategiyasının icrasında mühüm mərhələ olmaqla yanaşı, Qarabağ bölgəsinin bərpa olunan enerji potensialının beynəlxalq səviyyədə tanınmasına da töhfə verir.

N.Təbrizli