Azərbaycan dövlət müəssisələrinin özəlləşdirilməsini kapital bazarları vasitəsilə həyata keçirə bilər – BFB rəhbəri

Azərbaycan gələcəkdə dövlət müəssisələrinin özəlləşdirilməsini kapital bazarları vasitəsilə həyata keçirə bilər. Bu barədə Bakı Fond Birjasının (BFB) Müşahidə Şurasının sədri Fərid Axundov bildirib.

Onun sözlərinə görə, ölkədə özəl sektor yeni yetkinlik mərhələsinə qədəm qoyur və bu proses kapital bazarlarının dərinləşməsi ilə paralel gedir.

Axundov qeyd edib ki, PASHA Bank-ın ilkin kütləvi təklif (IPO) vasitəsilə bazara çıxması təkcə bank üçün deyil, bütövlükdə bazar üçün mühüm siqnaldır.

“Ümid edirik ki, digər özəl şirkətlər də bu yolu seçəcək və növbəti mərhələdə dövlət müəssisələri özəlləşdirmə planlarını məhz kapital bazarları vasitəsilə həyata keçirəcəklər,” – o bildirib.

O əlavə edib ki, bankın təsis mərhələsindən etibarən minoritar səhmdarların hüquqlarının qorunması prinsipləri nəzərə alınıb, o cümlədən Beynəlxalq Maliyyə Korporasiyası (IFC) ilə əməkdaşlıq çərçivəsində bu müddəalar təsis sənədlərində əksini tapıb.

Axundovun sözlərinə görə, kapital bazarlarının inkişafında əsas amil etimaddır.

“Bazar qarşısında etimad qazanmaq və onu qorumaq əsas missiyamızdır. Həm fərdi, həm də institusional investorların bazara inamı gücləndirilməlidir,” – o vurğulayıb.

O qeyd edib ki, BFB hazırda transformasiya mərhələsindədir və şəffaflıq, yüksək etik standartlar və investorların qorunmasına əsaslanan mühit formalaşdırmağa çalışır.

N.Təbrizli