Bolqarıstan SOCAR-ın CNG modelini Qarabağ üçün uyğun sayır

SOCAR və Bolqarıstanın M-Gaz şirkətinin 2024-cü ildən həyata keçirdiyi sıxılmış təbii qaz (CNG) təchizatı modeli Azərbaycanın çətin relyefli və azad edilmiş ərazilərində qazlaşdırma üçün istifadə oluna bilər.

Bunu Bolqarıstanın energetika nazirinin müavini Kiril Temelkov bildirib.

Onun sözlərinə görə, SOCAR və M-Gaz hazırda qaz kəmərinin çəkilməsinin iqtisadi və texniki baxımdan çətin olduğu yaşayış məntəqələrini CNG ilə təmin edir.

“Bu model Azərbaycanın azad edilmiş ərazilərində, xüsusilə dağlıq rayonlarda da tətbiq oluna bilər. Belə ərazilərdə qaz kəmərlərinin çəkilməsi mürəkkəb və bahalı prosesdir”, – Temelkov deyib.

Nazir müavininin sözlərinə görə, hazırda CNG təchizatı Bolqarıstan ərazisinin 10%-dən çoxunu əhatə edir. Ötən ildən sıxılmış qazın Şimali Makedoniyaya ixracına başlanılıb, yaxın vaxtlarda isə Azərbaycan qazından istehsal olunan CNG-nin Albaniyaya da tədarükü nəzərdə tutulur.

Temelkov bildirib ki, Bolqarıstan Azərbaycan qazının idxalını artırmaqda maraqlıdır. Hazırda Azərbaycan qazı ölkənin təbii qaza olan tələbatının təxminən 60%-ni qarşılayır.

Onun sözlərinə görə, Bolqarıstan 2024-cü ildə Azərbaycandan 1,896 milyard kubmetr, 2025-ci ildə isə 1,931 milyard kubmetr qaz alıb.

Azərbaycan qazı Bolqarıstana Cənub Qaz Dəhlizi və onunla əlaqəli Yunanıstan–Bolqarıstan interkonnektoru (IGB), eləcə də Türkiyə-Bolqarıstan sərhədində yerləşən “Malkoçlar/Strandja” qaz kompressor stansiyası vasitəsilə nəql olunur.

Nazir müavini qeyd edib ki, 2026-cı ildə “Malkoçlar/Strandja” stansiyasının ötürücülük qabiliyyətinin artırılması məsələsinə aydınlıq gətiriləcək.

“Əgər keçiriləcək market-test əlavə güclərə tələbat olduğunu təsdiqləsə, layihənin maliyyələşdirilməsi üçün resursların cəlb edilməsinə başlanacaq”, – Temelkov əlavə edib.

N.Tebrizli