IsDB Özəl Sektor Forumunda sazişlərin dəyəri 4,7 milyard dolları ötə bilər

 İslam İnkişaf Bankı (IsDB) Qrupunun Bakıda keçirilən Özəl Sektor Forumunda ümumi dəyəri 4,7 milyard dollardan çox olan sazişlərin imzalanması gözlənilir. Bunu iqtisadiyyat naziri Mikayıl Cabbarov bildirib.

Forumda çıxış edən nazirin sözlərinə görə, tədbir çərçivəsində 32-dən çox saziş və anlaşma memorandumunun imzalanması nəzərdə tutulur. Bu göstərici əvvəlki forumlarda əldə olunan 3,6 milyard dollarlıq razılaşmaları üstələyir.

Cabbarov bildirib ki, Azərbaycan özəl sektorun inkişafı, ticarətin maliyyələşdirilməsi, infrastruktur, kiçik və orta biznesə dəstək, yaşıl keçid və rəqəmsal transformasiyanı IsDB ilə əməkdaşlığın əsas istiqamətləri hesab edir.

Nazirin sözlərinə görə, iqtisadiyyatın şaxələndirilməsi ölkənin strateji prioritetidir. İstehsal, kənd təsərrüfatı və ərzaq emalı, logistika, bərpa olunan enerji, rəqəmsal texnologiyalar və ixracyönümlü digər qeyri-neft sahələri böyük potensiala malikdir.

O qeyd edib ki, Azərbaycan investorlara vergi və gömrük güzəştləri, investisiyaların qorunması mexanizmləri, güzəştli maliyyələşmə imkanları, həmçinin sənaye parkları və Ələt Azad İqtisadi Zonası kimi hazır investisiya platformaları təqdim edir.

Cabbarov Qarabağ və Şərqi Zəngəzur iqtisadi rayonlarında həyata keçirilən genişmiqyaslı bərpa proqramlarını da mühüm investisiya imkanları kimi qiymətləndirib.

Nazirin sözlərinə görə, 2021-2025-ci illərdə Azərbaycanın qeyri-neft iqtisadiyyatı orta hesabla ildə 6% böyüyüb, qeyri-neft sektorunun ÜDM-də payı isə 58%-dən 71%-ə yüksəlib. Qeyri-neft ixracı 2018-ci illə müqayisədə iki dəfədən çox artıb.

Forum çərçivəsində Azərbaycan Biznesin İnkişafı Fondu ilə Özəl Sektorun İnkişafı üzrə İslam Korporasiyası (ICD) arasında biznesin maliyyə resurslarına çıxışını genişləndirməyə yönəlmiş çərçivə sazişinin də imzalanması gözlənilir.

N.Təbrizli