Rusiya Ermənistandakı dəmir yollarının bərpasını müzakirə etməyə hazırdır

Rusiya Ermənistanda Türkiyə və Azərbaycan sərhədlərinə aparan dəmir yolu xətlərinin bərpası məsələsini müzakirə etməyə hazır olduğunu bildirib. Bu barədə Ermənistanın xarici işlər naziri Ararat Mirzoyan İctimai Televiziyaya müsahibəsində deyib.

"Cəmi 2-3 gün əvvəl Rusiya nümayəndələrinin detalları — kimin nə qədər investisiya yatırmalı olduğunu və digər məqamları anlamağa və müzakirə etməyə hazır olduqlarına dair siqnallar almışam", – deyə nazir qeyd edib.

Mirzoyan layihənin sonrakı gedişatının icra şərtlərindən asılı olacağını və məsələnin müvafiq qurumlar tərəfindən dərindən araşdırılmalı olduğunu vurğulayıb.

N.Təbrizli