Bakı və Berlin Orta Dəhlizə investisiyaları müzakirə edəcək

Bakı oktyabrın 6-da Alman-Azərbaycan Xarici Ticarət Palatasının (AHK Azərbaycan) təşkilatçılığı ilə baş tutacaq "Alman-Azərbaycan Strateji Tərəfdaşlıq və Bağlantılar Konfransı 2026" tədbirinə ev sahibliyi edəcək.

Konfrans Orta Dəhliz boyunca infrastruktur, nəqliyyat, logistika, yaşıl enerji və rəqəmsallaşma sahələrinə investisiya və maliyyə vəsaitlərinin səfərbər edilməsinə həsr olunub. Tədbirdə yüksək səviyyəli dövlət rəsmiləri, biznes rəhbərləri, beynəlxalq inkişaf bankları (MDB) və ixrac kredit agentlikləri (ECA) iştirak edəcək.

Tədbir AHK Azərbaycanın icraçı direktoru Nərgiz Vik, iqtisadiyyat naziri Mikayıl Cabbarov, energetika naziri Pərviz Şahbazov və Almaniyanın Azərbaycandakı səfiri Dirk Lölkenin açılış nitqləri ilə başlayacaq. Günün ikinci yarısında rəqəmsal inkişaf və nəqliyyat naziri Rəşad Nəbiyev əsas məruzə ilə çıxış edəcək.

Konfrans çərçivəsində infrastruktur, bərpa olunan enerji ötürülməsi, logistika və rəqəmsal həllərə dair dörd yüksək səviyyəli panel iclası, həmçinin "Nəqliyyat və logistika infrastrukturu", "Yaşıl enerjiyə keçid" və "Rəqəmsallaşma və ticarət" mövzularında üç biznes-dövlət (B2G) dəyirmi masası təşkil olunacaq.