Jorayev Azərbaycanda tərəfdaşlıq maliyyəsinin tənzimlənməsini gücləndirməyə çağırıb

Azərbaycan real sektorun, kiçik və orta biznesin, aqrobiznesin və yaşıl iqtisadiyyatın maliyyələşdirilməsi üçün tərəfdaşlıq maliyyəsi üzrə tənzimləmə bazasını gücləndirməlidir. Bunu Şəriətə nəzarət şuralarının sədri, islam maliyyəsi üzrə ekspert və auditor Abduraşid Ustaz Jorayev bildirib.

Onun sözlərinə görə, ənənəvi maliyyələşmədə münasibətlər əsasən kreditor və borcalan arasında qurulur, lakin bizneslərin və müştərilərin dəyişən ehtiyacları daha çevik maliyyə modelləri tələb edir. Jorayev həssas əhali qruplarının dəstəklənməsinin mikromaliyyənin əsas məqsədlərindən biri olaraq qalmalı olduğunu vurğulayıb.

Jorayev tərəfdaşlıq maliyyəsinin real aktivlərə, istehsala və infrastruktura bağlanmasının investorlar üçün cəlbedici ola biləcəyini deyib. O, Fars körfəzi ölkələrindəki fondları və Cənub-Şərqi Asiyanın maliyyə ekosistemlərini nümunə göstərərək, Azərbaycanda da bu kapitalı cəlb etmək üçün qəti addımların vacib olduğunu bildirib. Ekspertin təqdimatına görə, aktivlərə əsaslanan alternativ tərəfdaşlıq maliyyəsi bazarı 6 trilyon dolları ötür və ildə 15–20 faizdən çox artır.

Region ölkələrində hüquqi çərçivələrin genişləndiyini deyən Jorayev Özbəkistanın islam maliyyəsi və bankçılığını tətbiq etməyə yönəlmiş qanunvericilik dəyişikliklərini dəstəkləyən qanun qəbul etdiyini qeyd edib. 

Jorayev sukuk emissiyalarında qeyri-konfessional investorların da iştirak etdiyini deyərək, tərəfdaşlıq maliyyəsinin yalnız dini prinsiplərə uyğun maliyyə axtaran investorlarla məhdudlaşmadığını bildirib. Onun sözlərinə görə, bu alətlər infrastruktur və istehsal layihələrinə kapital cəlb etmək üçün də istifadə oluna bilər.

Gülnar Nazimqızı