Pensiya kapitalı artırıldıqca minimum pensiyaya çıxış məhdudlaşır - deputat

Azərbaycanda minimum pensiya almaq üçün tələb olunan pensiya kapitalının son beş ildə 28 800 manatdan 46 080 manata yüksəlməsi pensiyanın əlçatanlığını azaldır. Bunu deputat Əli Məsimli Milli Məclisdə 2027-ci ilin büdcə müzakirələrinə münasibət bildirərkən deyib.

Deputat hesab edir ki, bu fərq xüsusilə regionlarda yaşayan insanların minimum pensiya əldə etməsini çətinləşdirir.

Deputat bildirib ki, son beş ildə minimum pensiya cəmi 120 manat artaraq 200 manatdan 320 manata çatıb. Eyni dövrdə minimum pensiya almaq üçün tələb olunan pensiya kapitalı isə 17 280 manat artıb.

“Biri inzibati artım xəttidir, o birisi isə iqtisadi artım xəttidir. Bu isə bilavasitə xüsusilə regionlarda yaşayan insanların minimum pensiya əlçatanlığını azaldır və regionlarda yaşlı nəsil hesabına xeyli dərəcədə yoxsul insanlar formalaşmağa başlayıb. Hesab edirəm ki, bu, kifayət qədər ciddi məsələdir”, - o qeyd edib.

Əli Məsimli problemin aradan qaldırılması üçün ciddi təhlillərin aparılmasını, indeksləşdirmə və digər mexanizmlər vasitəsilə pensiyaların əlçatanlığının artırılmasını vacib sayır.

Deputatın sözlərinə görə, son beş ildə Azərbaycanda pensiyaçıların ümumi sayı 130 min nəfər azalıb, yaşa görə pensiya alanların sayı isə 180 min nəfər artıb.

O bildirib ki, yaşa görə pensiya alanların aldığı 220 manat məbləğində pensiya yaşayış minimumundan aşağıdır. Əli Məsimli bu kateqoriyadan olan şəxslərin pensiyalarının da indeksləşdirilməsinə ehtiyac olduğunu vurğulayıb.