2023-cü ilin əvvəlində Ermənistanda 100-dən çox İran şirkətinin təmsil olunacağı ticarət mərkəzi açılacaq. Ermənistan mediasının məlumatına görə bu barədə "Ermənistan-İran biznes əməkdaşlığının perspektivləri” mövzusunda müzakirələrdə Vardan Kostanyan deyib.
Kostanyan vurğulayıb ki, Ermənistan İranda Aİİ-nin üzvü kimi geniş şəkildə reklam olunur, burada birgə müəssisələr yaratmaqla ittifaq bazarına çıxmaq mümkündür.
"Biz eyni zamanda Tehranda oxşar ticarət mərkəzinin açılması üçün İran tərəfi ilə danışıqlar aparırıq. Danışıqlar effektiv şəkildə davam edir", - o deyib.
Vardannın fikrincə konkret açılış tarixləri barədə danışmaq hələ tezdir, qonşu ölkənin iqtisadi siyasətini nəzərə almaq lazımdır.
İranın Ermənistandakı ticarət nümayəndəsi Əkbər Qodari öz növbəsində Armavir bölgəsində İran kapitalı ilə mərkəzin açılacağını bildirib.
"Dövlət sektorunda bəzən problemlər olur, iqtisadiyyatda nöqsanlar olur. Biz Ermənistanla İran arasında aktivliyin artmasına təkan vermək üçün ticarət mərkəzinin yaradılması yolu ilə bu çatışmazlıqların bir hissəsini doldurmağa çalışdıq" - bildirib.
O bildirib ki, Ermənistanın İrandakı ticarət nümayəndəsi ilə birlikdə iki ölkənin iş adamları arasında əməkdaşlığı inkişaf etdirə biləcək mexanizm barədə fikirləşiblər. Dəstək mexanizmlərindən biri də xərclərin demək olar ki, tam ödənilməsi ilə erməni iş adamlarının İranda biznes sərgilərində iştirakının təşkilidir.
"Ermənistandan İrana səfər etmək və biznes sərgilərində iştirak etmək istəyən iş adamları yalnız biletlər haqqında fikirləşə bilər, qalanını İran tərəfi təşkil edir. Biz də erməni tərəfi üçün B2B görüşlər təşkil etmək qərarına gəldik. Düşünürəm ki, bu, erməni iş adamlarına kömək edəcək. İranı və onun iqtisadiyyatını daha yaxşı başa düşürlər” - Qodari deyib.
Gülnar Nazimqızı
www.anews.az
Bizi sosial şəbəkələrdə izləyin !