İsveçrə dondurulmuş Rusiya aktivlərini Ukraynanın bərpasına sərf etməyə qarşı deyil, lakin bunun üçün referendum tələb oluna bilər.

 "RBK-Ukrayna” xəbər verir ki, bu barədə İsveçrənin xarici işlər naziri İqnasio Kassis "Tages-Anzeiger” nəşrinə müsahibəsində bildirib.

"Ukraynanın bərpasına kömək etməkdə ciddiyiksə, onu necə maliyyələşdirəcəyimizi düşünməliyik”, - deyən nazir əlavə edib ki, Qərb ölkələri Rusiyanın aktivlərinin müsadirə edilməsi addımını müzakirə edir.

Kassis vurğulayıb ki, İsveçrə 7,5 milyard frank (8,2 milyard ABŞ dolları) dəyərində Rusiya aktivini dondurub, lakin ölkə qanunvericiliyinə görə, onlar müsadirə oluna bilməz. Bu qanunu dəyişdirmək üçün isə yəqin ki, referendum tələb olunacaq.