Ermənistanda Sarkisyanın gizlətdiyi qırğın

Yalnız yas mərasimində 4 nəfərin ölümü ilə nəticələnən hadisədən sonra açıqlama verən Ermənistanın polis rəisi Unan Poqasyan demək olar ki, vətəndaşlarını ələ salıb. Erməni mətbuatına hadisə ilə bağlı müsahibə verən polis rəisi narahatçılığa heç bir əsasın olmadığını, hər şeyin nəzarət altında olduğunu deyib.

Güc strukturunda məsul vəzifədə çalışan şəxsin ölkədə ard-arda baş verən cinayət hadisələri fonunda belə danışığı sanki cəmiyyəti ələ salmaq, insanların gözünə kül üfürməkdən başqa bir şey deyil. Bəlkə baş verən qırğınların ört-basdır olunması yüksək səviyyəli tapşırıqdır?Polis rəisi baş vermiş son hadisələri elə də ciddi hesab etmir. Cəmiyyəti arxayın olmağa çağıran U.Poqasyan  baş vermiş  cinayət hadisələrinin məişət xarakterli olduğuna eyham vurur. O, müsahibəsi zamanı Sevanda baş verən hadisəni yay mövsümü ilə əlaqələndirib. Ölkədə geniş rezonans doğuran bu hadisələri istirahət zonasında dincələnlər arasında gərginliyin olması ilə əlaqələndirilməsi nağıldan başqa bir şey deyil.