Deputatdan Qarabağ çağırışı: Azərbaycan-Türkiyə…

Axar.az xəbər verir ki, yüzlərlə insanın, millət vəkilləri, rəsmi şəxslər, QHT və KİV rəhbərlərinin iştirak etdiyi konfransda millət vəkili Qənirə Paşayeva Dağlıq Qarabağ münaqişəsi, Xocalı soyqırımı ilə bağlı geniş məruzə ilə çıxış edib.

Azərbaycan Milli Elmlər Akademiyasınını Fəlsəfə İnstitutunun rəhbəri, professor İlham Məmmədzadə, siyasət şöbəsinin rəhbəri, professor Rəna Mirzəzədə, Regional Hüquqi və İqtisadi Maarifləndirmə İB-nin rəhbəri Arzu Bağırova çıxış edərək Xocalıya Ədalət kampaniyası ilə bağlı geniş məlumatlar veriblər.

Q.Paşayeva çıxışında beynəlxalq təşkilatların ikili standartlardan yanaşmalarını kəskin qınayıb:

"Ermənistanın işğal etdiyi Azərbaycan torpaqlarının azad edilməsi ilə bağlı qətnamələr var, amma onların həyata keçirilməsi üçün Ermənistana heç bir təzyiq göstərmir. İnsan haqlarından danışan beynəlxalq təşkilatlar Ermənistanın işğalçılığı üzündən öz evinə dönə bilməyən 1 milyon azərbaycanlı qaçqın və məcburi köçkünün haqlarının müdafiəsi istiqamətində heç bir addım atmır. Qərbin ikili standartlarını Xocalı soyqırmına yanaşmada daha aydın gördük. 100 il əvvəl tarixdə olmayan soyqırım barədə qərar qəbul edənlərin əksəriyyəti modern dünyanın gözləri qarşısında Ermənistanın Xocalıda törətdiyi dəhşətli soyqırımı görmək istəmədi. Eyni vəziyyət Türkiyəyə, türk dünyasına qarşı yanaşmada da özünü göstəririr”.

Millət vəkili bildirib ki, beynəlxalq hüququn tamamilə zəiflədiyi, beynəlxalq təşkilatların bir neçə böyük ölkənin maraqlarını müdafiə edən təşkilatlara çevrildiyi bir dünyada haqqını qoruya bilmənin tək yolu gücdür:

"Bu güc isə birlikdən keçir. Ona görə də Azərbaycan-Türkiyə olaraq birliyimizi daha da gücləndirməli, gənc nəsillərimizi bir-birimizə daha çox sahib ola bilmə ruhunda yetişdirməli və haqsızlıqlara qarşı birlikdə mübarizə aparmalıyıq. Son günlər bölgədə vəziyyət daha da gərginləşir. Qardaşlıq yaxşı gündə də, çətin gündə də birlikdə olmaqdır. Bu məsələdə gənclərimizin üzərinə də çox böyük missiya düşür. Türk gəncliyi tariximizə sahib çıxmalı, sosial mediada, virtual aləmdə fəal olmlı, Azərbaycan həqiqətlərinin daha geniş şəkildə yayılması məqsədilə sosial mediada öz səylərini artırmalıdırlar”.