STM və SETA rəhbərləri görüşdü

Görüşdə iki qurum arasında geniş əlaqələr yaradılıb, müəyyən proseslər həyata keçirilib, eyni zamanda pandemiya dövrdə onlayn razılaşmalarla həyata keçirilən əməkdaşlıq  artıq yenilənmiş və daha da geniş rəsmi formada sədrlər səviyyəsində təsdiq edilib. 

SETA kimi qlobal beyin mərkəzi ilə qurulan münasibətlər Azərbaycanda  dövlət idarəçiliyində STM –in timsalında beyin mərkəzlərinin işinin getdikcə daha geniş şəkildə təşəkkül tapması və mühitin təcrübələrindən daha geniş şəkildə istifadəni də aktuallaşdırır.

Elmi, intellektual, müasir data-analiz sahəsində biliklərin mübadiləsi, birgə layihələr, kadr hazırlığı, study kurslar, o cümlədən birgə siyasi gündəmin analiz edilməsi, bir-birinin siyasi gündəmi ilə yaxından tanışlıq, müxtəlif beynəlxalq tədbirlərdə bir-birlərinin nəzərə alınması və s. məsələlər imzalanan əməkdaşlıq sənədində öz əksini tapıb.

Görüşdə ikinci Qarabağ müharibəsindən sonra Prezident İlham Əliyevin rəhbərliyi altında Cənubi Qafqazda formalaşan yeni düzən və Türkiyənin, onun liderinin bu prosesdə aktiv iştirakı, həyata keçirilən kommunikasiya, bir sözlə, yeni sülh quruculuğu siyasətində beyin mərkəzlərinin roluna xüsusi vurğu edilib. 

Qarşıdakı dövrdə heyətlərin  görüşləri, qarşılıqlı səfərlər, onlayn platformalarda məsləhətləşmələrə qərar verilib.

 SETA qurumu daxili  siyasət, xarici siyasət, iqtisadiyyat, cəmiyyət və media, hüquq və insan hüquqları, təhlükəsizlik, strateji, təhsil və sosial siyasət, Avropa üzrə  tədqiqatlar və enerji sahələrində geniş tədqiqat işləri aparır, onları müasir elmi texnologiyalar vasitəsilə təqdim edir.

 

Qurum təkcə mövcud məsələlər dair araşdırmalar aparmır, eyni zamanda problemlərin həllinə dair təkliflər təqdim edir.