Ermənistan öhdəliklərini yerinə yetirməlidir - Əliyev

 

"Zəngəzur dəhlizi" termini Azərbaycan İkinci Qarabağ müharibəsində qazandığı qələbədən sonra  beynəlxalq gündəmə gətirilib, beynəlxalq lüğətə daxil edilib və bu gün artıq Zəngəzur dəhlizi dünyada qəbul edilən ifadəyə, terminə çevrilib.  Əlbəttə ki, biz bu dəhlizin açılması üçün praktiki addımlar atırıq", - İlham Əliyev  nəqliyyat məsələlərinə həsr olunan müşavirədə bildirib. 

Ermənistanın "Sülh qovşağı" layihəsi barədə danışan Prezident bildirib ki, bu layihəni dünya üzrə təqdim etmədiyi ölkə qalmayıb. 

"Lakin bu layihə Azərbaycansız heç bir dəyər daşımır. Əgər siz bu layihəni həqiqətən həyata keçirmək istəyirsinizsə, ilk növbədə Azərbaycana müraciət etməlisiniz, çünki bizsiz bu layihə sadəcə bir kağız parçasıdır. Bizim irəli sürdüyümüz şərtlər isə ədalətlidir, beynəlxalq hüquqa və Ermənistanın öz öhdəliklərinə əsaslanır", - dövlət başçısı vurğulayıb.

İlham Əliyev həm beynəlxalq səviyyədə, həm də Ermənistanla ikitərəfli təmaslarda Azərbaycan ərazisindən Azərbaycana maneəsiz keçidin təmin olunmasının əsas tələb olduğunu vurğulayıb.

"Azərbaycanın Azərbaycanla maneəsiz və sərbəst əlaqəsi təmin olunmalıdır. Bu keçid heç bir yoxlama və maneə olmadan həyata keçirilməlidir",  -  Əliyev deyib. 

Prezident əlavə edib ki, 1920-ci ilin noyabrında sovet hakimiyyəti Zəngəzuru Azərbaycandan alaraq azərbaycanlılara qarşı tarixi cinayət törədib.

İlham Əliyev yanvarın 28-də  nəqliyyat məsələlərinə həsr olunan müşavirə keçirib. Bu barədə dövlət başçısının rəsmi saytı məlumat yayıb.