Kanada Azərbaycana təşəkkür edib

Kanada, vətəndaşlarının İsrail-İran qarşıdurması fonunda İrandan təxliyəsinə göstərdiyi dəstəyə görə Azərbaycana təşəkkür edib. Bu barədə Azərbaycan Xarici İşlər Nazirliyi məlumat yayıb.

Məlumata görə, Azərbaycanın xarici işlər naziri Ceyhun Bayramov ilə Kanadanın xarici işlər naziri Anita Anand arasında telefon danışığı baş tutub.

Danışıq zamanı regional təhlükəsizlik vəziyyəti və təxliyə əməliyyatları müzakirə olunub. Anita Anand Kanada vətəndaşlarının İrandan çıxarılmasında göstərilən yardıma görə rəsmi Bakıya təşəkkürünü ifadə edib.

Ceyhun Bayramov həmkarını yeni vəzifəsi münasibətilə təbrik edib və ona uğurlar arzulayıb. Tərəflər ikitərəfli münasibətlər və regional məsələlər üzrə fikir mübadiləsi də aparıblar.