İlham Əliyev və Şahbaz Şərif arasında telefon danışığı olub

Azərbaycan Prezidenti İlham Əliyev ilə Pakistanın Baş naziri Şahbaz Şərif arasında telefon danışığı olub.Bu barədə Azərbaycan Prezidentinin “X” hesabında məlumat paylaşılıb.

Tərəflər Azərbaycan ilə Pakistan arasında qardaşlıq və strateji tərəfdaşlıq münasibətlərini bir daha təsdiqləyib, enerji, ticarət və insanlararası əlaqələr də daxil olmaqla bir sıra sahələrdə əməkdaşlığın genişlənməsini müsbət qiymətləndiriblər. 

Şahbaz Şərif Bakıda keçiriləcək Ümumdünya Şəhərsalma Forumunun əhəmiyyətini vurğulayaraq, Azərbaycanın qlobal şəhərsalma gündəliyinə töhfəsini qeyd edib. İlham Əliyev isə forumun şəhərsalma sahəsində aparıcı beynəlxalq platformalardan biri olduğunu bildirib.

Pakistanın baş naziri təxirəsalınmaz işləri ilə əlaqədar forumda iştirak edə bilməyəcəyini, lakin ölkəsinin tədbirdə yüksək səviyyədə təmsil olunacağını deyib.

Tərəflər regional proseslər, xüsusilə Yaxın Şərqdəki vəziyyət ətrafında fikir mübadiləsi aparıblar. İlham Əliyev Pakistanın vasitəçilik təşəbbüslərini və gərginliyin azaldılması istiqamətində səylərini yüksək qiymətləndirib.

Liderlər əlaqələrin davam etdirilməsi barədə razılığa gəliblər. Şahbaz Şərif İlham Əliyevi Pakistana səfərə dəvət edib, Azərbaycan Prezidenti dəvəti qəbul edib.