Alen Simonyan Ermənistan prezidenti olacağı barədə iddiaları təkzib edib

Ermənistan parlamentinin sədri Alen Simonyan ölkə prezidenti vəzifəsinə keçəcəyi barədə mətbuatda yayılan məlumatları təkzib edib.

Simonyan iyulun 2-də jurnalistlərə açıqlamasında bu iddiaları "cəfəngiyat" adlandırıb.

"Bu, cəfəngiyatdır. Mən belə bir şey düşünmürəm, heç kimlə də bu barədə söhbətim olmayıb. Bunu düzgün hesab etmirəm", - o bildirib.

Parlament sədri hazırkı prezidentə hörmətlə yanaşdığını da vurğulayıb.

"Ermənistan Respublikasının prezidenti var. Bir vətəndaş olaraq o, mənim ən hörmət etdiyim prezidentdir. Onu çox sevirəm və hörmət edirəm. Bu cür söhbətlər sadəcə cəfəngiyatdır", – Simonyan qeyd edib.

O, eyni zamanda aktiv siyasətdən ayrılmaq niyyətində olmadığını bildirib.

"Mən siyasətdən getmirəm. Seçki kampaniyasında vətəndaşlarımıza verdiyimiz vədlərə sadiq qalacağam. İndiyədək 'səngərimi' burada qorumuşam, bundan sonra da başqa mövqedə qorumağa davam edəcəyəm. Heç bir vəzifə əbədi deyil", - Simonyan bildirib.

Alen Simonyan daha əvvəl növbəti çağırış parlamentdə deputat mandatını qəbul etməyəcəyini və parlament sədri vəzifəsini davam etdirməyəcəyini açıqlayıb. Hakim "Vətəndaş Müqaviləsi" Partiyası yeni parlamentin spikeri vəzifəsinə hazırkı vitse-spiker Ruben Rubinyanın namizədliyini irəli sürüb. Simonyan isə siyasi fəaliyyətini davam etdirəcəyini bəyan edib.

Gülnar Nazimqızı