İlham Əliyev Zəngəzur dəhlizinin regional əhəmiyyətini açıqlayıb

Zəngəzur dəhlizi Şərq-Qərb nəqliyyat dəhlizinin bir qolu olacaq.Bunu Prezident İlham Əliyev Azərbaycan Televiziyasına müsahibəsində deyib.

Onun sözlərinə görə, Zəngəzur dəhlizinin əhəmiyyəti yalnız Azərbaycanla məhdudlaşmayacaq və daha geniş coğrafiyanı əhatə edəcək.

"Bu yolun əhəmiyyəti təkcə Azərbaycan üçün yox, geniş coğrafiya üçün olacaq. Çünki bu, Şərq-Qərb nəqliyyat dəhlizinin bir qolu olacaq. Eyni zamanda, Şimal-Cənub nəqliyyat dəhlizinin bir qolu olacaq", - İlham Əliyev bildirib.

Prezident qeyd edib ki, Zəngəzur dəhlizinin açılması ilə Azərbaycan və İran arasında Naxçıvan üzərindən ikinci dəmir yolu bağlantısı yaranacaq.

"Azərbaycan ərazisində bu layihə hazırdır. Amma Zəngəzur dəhlizi açılandan sonra artıq Azərbaycandan İrana ikinci dəmir yolu xətti açılacaqdır. Məhz Zəngəzur dəhlizindən Naxçıvana girərək və Culfa dəmiryol məntəqəsindən İrana dəmir yolu var", - o deyib.

İlham Əliyev bildirib ki, bu marşrut Şimal-Cənub nəqliyyat dəhlizinin Fars körfəzinə, daha sonra isə Pakistan kimi ölkələrə uzanmasına imkan verə bilər.

Prezidentin sözlərinə görə, Zəngəzur dəhlizindən ildə 15 milyon ton və ya daha çox yükün keçməsi Naxçıvanda iqtisadi fəallığın artmasına, yeni iş yerlərinin açılmasına və bölgənin mühüm nəqliyyat mərkəzlərindən birinə çevrilməsinə şərait yarada bilər.

"Buradan keçən, tutaq ki, 15 milyon ton, bəlkə daha çox yük daha böyük canlanmaya gətirib çıxaracaq. Daha çox iş yerləri açılacaq, iqtisadi fəallıq artacaq və Naxçıvan, deyə bilərəm ki, əvəzolunmaz nəqliyyat mərkəzlərindən birinə çevriləcəkdir", - dövlət başçısı vurğulayıb.

İlham Əliyev Azərbaycanın açıq dənizlərə və okeanlara çıxışının olmadığını qeyd edərək, ölkənin Avrasiya nəqliyyat dəhlizlərində mühüm mövqeyə malik olduğunu bildirib.

"Bizi bypass etmək, bizdən yan keçmək mümkün deyil. Bax, Naxçıvanın da eyni gələcəyi olacaqdır və əlbəttə ki, bu, bizə həm iqtisadi, həm başqa dividendlər gətirəcək", - Prezident deyib.