Azərbaycan-ABŞ strateji tərəfdaşlıq münasibətlərinin cari vəziyyəti müzakirə edilib

Azərbaycanın xarici işlər naziri Ceyhun Bayramov və ABŞ dövlət katibi Marko Rubio arasında telefon danışığı olub.Bu barədə Azərbaycan Xarici İşlər Nazirliyi məlumat yayıb.

Telefon danışığı zamanı Azərbaycan-ABŞ strateji tərəfdaşlığının hazırkı vəziyyəti və inkişaf perspektivləri, həmçinin Azərbaycan-Ermənistan normallaşma prosesi müzakirə edilib.

Tərəflər 8 avqust 2025-ci ildə Vaşinqtonda keçirilən zirvə görüşündən sonra ikitərəfli münasibətlərin strateji tərəfdaşlıq istiqamətində inkişafında əldə olunan irəliləyişləri qeyd ediblər.

Görüşdə Azərbaycan və ABŞ arasında Strateji Tərəfdaşlıq Xartiyasında müəyyənləşdirilən prioritet istiqamətlər üzrə yaradılan işçi qruplarının fəaliyyətinin ikitərəfli əməkdaşlığın dərinləşdirilməsi baxımından əhəmiyyəti vurğulanıb.

Bundan əlavə, 2026-cı ildə enerji, investisiya, rəqəmsal texnologiyalar və ticarət sahələrində əldə olunan nəticələr, o cümlədən Bakı Enerji Həftəsi və II Azərbaycan Beynəlxalq İnvestisiya Forumu çərçivəsində imzalanan sənədlər müzakirə olunub.

Bayramov Azərbaycanın sülh gündəliyinin irəlilədilməsi, etimad quruculuğu və regional sabitliyin möhkəmləndirilməsi istiqamətində atdığı addımlar barədə Rubioya məlumat verib.

Tərəflər qarşılıqlı maraq doğuran digər məsələlər ətrafında da fikir mübadiləsi aparıblar.