Azərbaycanda itkin düşmüş 913 nəfərə aid olduğu ehtimal edilən qalıqlar aşkarlanıb

Oktyabrın 1-dək Azərbaycanda Qarabağ münaqişəsi nəticəsində itkin düşən  913 nəfərə aid olduğu ehtimal edilən meyit qalıqları aşkarlanaraq götürülüb. Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri Əli Nağıyev bildirib.

İyunun sonuna olan məlumata görə, 893 nəfərə aid olduğu ehtimal edilən qalıqlar aşkarlanmışdı. Beləliklə, son üç ayda bu göstərici 20 nəfər artıb.

Nağıyevin sözlərinə görə, işğaldan azad edilmiş ərazilərdə aşkarlanan 32 kütləvi məzarlıqdan 253 şəxsə aid olduğu ehtimal edilən qalıqlar ekshumasiya edilib.

Oktyabrın 1-nə Dövlət Komissiyasında Azərbaycanın 4 010 itkin düşmüş vətəndaşı qeydiyyatdadır. Onlardan 4 004 nəfər Birinci Qarabağ müharibəsi, altı nəfər isə 2020-ci il 44 günlük müharibə zamanı itkin düşüb.

İtkinlərin 3 228 nəfəri hərbçi, 782 nəfəri mülki şəxsdir. Mülki şəxslər arasında 71 uşaq, 288 qadın və 319 ahıl şəxs var.

Qalıqların eyniləşdirilməsi məqsədilə itkinlərin yaxın qohumlarından ümumilikdə 11 566 donorun bioloji nümunələri toplanıb.

Aytac Zeynalova