Azərbaycanda 39 yeni hakim and içib

Azərbaycanda müxtəlif birinci instansiya məhkəmələrinə təyin olunan 39 hakimin andiçmə mərasimi keçirilib. Bu barədə Ali Məhkəmədən məlumat verilib.

Ali Məhkəmənin sədri İnam Kərimov yeni təyin olunan hakimləri təbrik edib və onlara gələcək fəaliyyətlərində uğurlar arzulayıb.

O, Azərbaycanda həyata keçirilən məhkəmə-hüquq islahatlarının məhkəmə sisteminin müasirləşdirilməsinə, ədalət mühakiməsinin əlçatanlığının artırılmasına və hakim korpusunun peşəkar kadrlarla komplektləşdirilməsinə töhfə verdiyini bildirib.

İnam Kərimov hakimliyin böyük məsuliyyət və yüksək mənəvi keyfiyyətlər tələb edən peşə olduğunu vurğulayıb. O, hakimlərə fəaliyyətlərində qanunun aliliyini, müstəqillik, qərəzsizlik və ədalət prinsiplərini rəhbər tutmağı, hakim adının nüfuzunu qorumağı tövsiyə edib.

Daha sonra hakimlər “Məhkəmələr və hakimlər haqqında” Qanunun tələblərinə uyğun olaraq and içiblər. Onlara hakimin xüsusi geyim forması təqdim olunub.

Mərasimdə çıxış edən yeni təyin olunmuş hakimlər Nuranə Məmmədova və Səbuhi Abbasov göstərilən etimadı doğruldacaqlarını və ədalət mühakiməsinin prinsiplərinə əməl edəcəklərini bildiriblər.