Pedoqoji Universitetdə əmək haqları artırıldı

Azərbaycan Dövlət Peqoqoji Universitetinin (ADPU) Elmi Şurasında keçirilən iclasda əməkdaşların sosial vəziyyətlərinin gücləndirilməsi məqsədilə onların vəzifə maaşlarına edilən əlavənin artırlması məsələləri müzakirə olunub və yekdilliklə qərar qəbul edilib.

Universitetin Mətbuat və informasiya şöbəsi verilən məlumata görə, ADPU-nun Elmi Şurasının qəbul etdiyi qərara əsasən bu ilin mart ayının 1-dən əməkdaşların əmək haqlarına onların vəzifələri və iş həcminə uyğun olaraq 30-200 manat məbləğində əlavələr ediləcək. Hazırda ADPU-nun dekanlarının əmək haqları 1139 manat, kafedra müdirlərinin əmək haqları isə 1035 manatdır.

Qeyd edək ki, əmək haqlarına artım ADPU-nun 1400-dən çox əməkdaşına şamil ediləcək. Eyni zamanda Elmi Şuranın iclasında bu ilin fevral ayından başalayaraq normativ təhsil müddətində alt qruplarda (yay məktəbi istisna olmaqla) təhsil alan tələbələrin əlavə kreditlər üzrə təhsil haqlarının ADPU-nun daxili imkanları hesabına ödənilməsi haqqında da qərar qəbul edilib.

Bundan başqa, universitetdə tədrisin keyfiyyətini yüksəltmək, həmçinin dekan, kafedra müdirləri, dekan müavinləri və professor-müəllim heyətinin fəaliyyətini stimullaşdırmaq məqsədilə hər semestrin imtahan sessiyasının yekunlarına görə (nəzərdə tutulan şkalalara uyğun olaraq) növbəti semestrdə diferensiasiya prinsipi ilə əmək haqlarına əlavələr edilməsi barədə qərar qəbul edib.

Həmçinin, tələbələr arasında rəqabət mühitini yaratmaq üçün hər semestrin sonunda ən yüksək göstəricilərə nail olan bir qrupun bütün tələbələrinə (həm dövlət sifarişi, həm də ödənişli əsaslarla təhsilalanlara) 1 aylıq təqaüdləri həcmində pul mükafatı verilməsi barədə qərar qəbul olunub.

Elmi Şuranın universitet əməkdaşlarının və tələbələrin rifah halının yaxşılaşdırılmasına xidmət edən bu qərarı onların razılığına səbəb olub