"Bakı-2015" Tiflisdə təqdim olundu

“Bakı-2015” ilk Avropa Oyunları Gürcüstan Milli Olimpiya Komitəsinin yaradılmasının 25-ci ildönümü münasibətilə keçirilən tədbirlərin bir hissəsi olaraq Tiflisdə MDB və Baltikyanı ölkələrin Milli Olimpiya komitələrinin regional forumunda təqdimat keçirib.ANN.Az-ın  AzərTAc–a istinadən yaydığı xəbərə görə, tədbirlərdə Beynəlxalq Olimpiya Komitəsinin (BOK) Olimpiya Həmrəyliyi üzrə Milli Olimpiya Komitəsi Mübadilə və Regional Forumlar proqramı çərçivəsində ümumilikdə 15 ölkədən dəvət olunmuş nümayəndələr, o cümlədən BOK-un üzvləri iştirak ediblər.“Bakı-2015”in və Azərbaycan Milli Olimpiya Komitəsinin üzvlərindən ibarət nümayəndə heyəti birinci Avropa Oyunları ilə bağlı görülən hazırlıq işləri barədə iştirakçılara məlumat verib. “Bakı-2015” Avropa Oyunları Əməliyyat Komitəsinin atlet xidmətləri və əməliyyatlar şöbəsinin direktoru Ceyms Makleod deyib: “Azərbaycanın əldə etdiyi uğurlar barədə qonşu ölkələri məlumatlandırmaq baxımından Gürcüstan Milli Olimpiya Komitəsi tərəfindən belə mühüm tədbirə dəvət olunmaq bizim üçün gözəl imkandır. Biz həmin ölkələrin idmançılarının Bakıda keçiriləcək birinci Avropa Oyunlarında yarışacaqlarını səbirsizliklə gözləyirik. Gürcüstanın Milli Olimpiya Komitəsini 25 ildə əldə etdiyi uğurlar münasibətilə təbrik etmək və gələcəkdə daha böyük nailiyyətlər qazanmağı arzulamaq istərdim”.Beynəlxalq Olimpiya Komitəsinin prezidenti Tomas Bax və Avropa Olimpiya Komitəsinin prezidenti Patrik Hikki də tədbirdə iştirak ediblər.Gürcüstan Prezidenti Giorgi Marqvelaşvili və Baş nazir İrakli Qaribaşvili gələn il baş tutacaq birinci Avropa Oyunlarına qatılmaq arzusunda olan gənc idmançılarla görüşüblər.ANN.Az