Azərbaycan deputatları Rusiyada Dövlət Dumasına seçkiləri müşahidə edəcək

 Azərbaycan deputatlarının Rusiyada keçiriləcək Dövlət Dumasına seçkilərin monitorinqində iştirak edəcəyi gözlənilir. Milli Məclisin mətbuat xidmətindən Anews.az-a bildirilib ki, seçkilərdə iştirak edəcək deputatların siyahısı yaxın günlərdə açıqlanacaq.

Rusiya Federasiya Şurası sədrinin birinci müavini Andrey Yatskin Azərbaycanın Rusiyadakı səfiri Rəhman Mustafayevlə görüşdə Azərbaycan nümayəndələrinin seçkilərin monitorinqində iştirak edəcəyinə ümid etdiyini bildirib.

Federasiya Şurasının məlumatına görə, görüşdə Rusiya-Azərbaycan parlamentlərarası əlaqələri və ikitərəfli gündəlikdəki məsələlər müzakirə olunub.

Yatskin Rusiya və Azərbaycan prezidentlərinin müəyyən etdiyi dövlətlərarası münasibətlər gündəliyinin parlamentlər tərəfindən konstruktiv məzmunla zənginləşdirilməsinin vacibliyini vurğulayıb.

Mustafayev isə Bakı ilə Moskva arasında münasibətlərin müsbət mərhələdə olduğunu və parlamentlərarası əlaqələrin dövlətlərarası əməkdaşlığın mühüm elementi sayıldığını bildirib.

Rusiya Dövlət Dumasına 9-cu çağırış deputat seçkilərinin 18-20 sentyabr 2026-cı ildə keçirilməsi planlaşdırılır. Seçkilərdə 450 deputat seçiləcək.

Azərbaycan MDB üzvü kimi təşkilatın xətti ilə seçkilərin müşahidəsində iştirak edir.

Azərbaycan deputatları əvvəlki illərdə də Rusiya Dövlət Dumasına seçkilərin monitorinqində iştirak ediblər. 2021-ci ildə Mixail Zabelin, Nizami Səfərov, Fatma Yıldırım, Şahin Seyidzadə və Anar Məmmədov, 2016-cı ildə isə Rüfət Quliyev müşahidəçi kimi Rusiyada olublar.

Gülnar Nazimqızı