Magistratura və doktorantura bitirən zabitlər üçün hərbi rütbədə xidmət müddəti azaldılacaq

Azərbaycanda magistratura və ya doktorantura təhsili almış zabitlərin növbəti hərbi rütbəyə keçməsi üçün tələb olunan xidmət müddətinin azaldılması təklif edilir.

Bununla bağlı məsələ Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında müzakirəyə çıxarılan “Hərbi xidmətkeçmə haqqında” Əsasnamənin təsdiq edilməsi barədə” və “Hərbi vəzifə və hərbi xidmət haqqında“ qanunlara dəyişiklikdə öz əksini tapıb. 

Silahlı Qüvvələrin və hərbi xidmət nəzərdə tutulan digər dövlət qurumlarının sifarişi ilə magistratura və ya doktorantura təhsilini müvafiq elmi dərəcə ilə başa vuran zabitlərin hərbi rütbədə olma müddəti bir il azaldılacaq.

Güzəşt ali təhsilin hər bir pilləsi üzrə yalnız bir dəfə tətbiq ediləcək.

Layihədə beşillik təhsil proqramı üzrə hərbi qulluqçu hazırlayan xüsusi təyinatlı ali təhsil müəssisələrinin məzunları üçün “leytenant” rütbəsində xidmət müddətinin iki il müəyyənləşdirilməsi də nəzərdə tutulur.

Aviasiyanın uçuş heyətində və sualtı gəmilərdə xidmət edən hərbi qulluqçular üçün bu müddət bir il olacaq.

Digər hallarda müddətin bir il müəyyən edilməsi müvafiq dövlət qurumunun qərarından asılı olacaq.

Qanun layihəsinin əsaslandırılmasında dəyişikliklərin hərbi qulluqçuların rütbələrdə xidmət müddətinin təhsil səviyyəsinə uyğun tənzimlənməsi, ali təhsil və elmi fəaliyyətin stimullaşdırılması məqsədi daşıdığı bildirilir.

Sənəd “Hərbi xidmətkeçmə haqqında” Əsasnaməyə və “Hərbi vəzifə və hərbi xidmət haqqında” qanuna dəyişiklikləri nəzərdə tutur.

Gülnar Nazimqızı