Financial Times: Aİ yeni ukraynalı miqrant axınına hazırlaşır

Avropa İttifaqı ölkələri Ukrayna vətəndaşlarının yeni axınına hazırlaşır və gələcəkdə yaranmış vəziyyətin öhdəsindən gəlmək üçün lazımi tədbirlər görür. Bu barədə Financial Times qəzeti avropalı rəsmilərə istinadən xəbər verir.


Qəzet qeyd edir ki, Avropa ölkələri qışın yaxınlaşması və Ukraynada enerji infrastrukturunun zədələnməsi fonunda ukraynalı miqrantları qəbul etmək planları hazırlayır.

Nəşrin adının çəkilməsini istəməyən mənbələrindən birinin sözlərinə görə, Avropa Komissiyası (AK) yeni qaçqınları qəbul etməyə hazır olduğuna əminliyini ifadə edib, ona görə də hazırda miqrasiya sahəsində fövqəladə tədbirləri yeniləyir.


Bundan əlavə, nəşr yazır ki, Aİ sammitində tərəflər "Ukraynanın qışa hazırlığını təmin etmək üçün humanitar yardımın aktivləşdirilməsi” barədə razılığa gələcəklər.

"Bizim prioritetimiz Ukraynaya son həftələrdəki bombardmanlardan sonra lazım olan avadanlıqların çatdırılmasını təmin etməkdir. Onların buna ehtiyacı var, çox ehtiyacı var. Vəziyyət hər gün pisləşir”, - FT Kiyev və AK ilə danışıqlara cavabdeh olan Polşa rəsmisindən sitat gətirib.


Bundan əvvəl "The Independent” yazıb ki, ukraynalı qaçqın axını Avropa İttifaqında ən böyük siyasi böhrana səbəb olub.

www.anews.az