Türkiyə XİN Laçın yolu ilə bağlı bəyanat yayıb

"Təəssüflər olsun ki, Azərbaycanın uzun müddətdir dilə gətirdiyi bu narahatlıqlar diqqətə alınmayıb və bunun da nəticəsində Azərbaycan öz suveren haqları çərçivəsində uyğun bildiyi tədbirləri görüb. Türkiyə Laçın yolu mövzusunda Azərbaycana qarşı tənqidlərin əsasının olmadığı qənaətindədir. Hazırda Laçın yolundan tibbi məqsədli keçidlərin təmin edilməsi, eləcə də məhsulların daşınması üçün uyğun olan digər marşrutların təsis edilməsi Azərbaycanın maksimum səy nümayiş etdirdiyini göstərir”, - deyə bəyanatda qeyd olunub. Həmçinin qeyd olunub ki, Türkiyənin Ermənistandan gözləntisi ölkənin təxribatlardan çəkinməsi, Azərbaycanın ərazi bütövlüyünü və suverenliyini tanıması, Qarabağda olan erməni əhalinin ehtiyaclarının qarşılanması üçün Ağdam-Xankəndi və digər alternativ yollardan istifadə olunmasına, eləcə də erməni əhalinin Azərbaycana reinteqrasiya prosesinə dəstək verməsidir", - bəyanatda bildirilib. 

 

Avqustun 9-da Litva, 4-də isə Kanada Laçın yolunun "bağlı" qalmasına narahatlığını ifadə edən bəyanat yayıb. 

 

Avqustun 1-də Azərbaycan prezidenti İlham Əliyev "Euronews” telekanalına müsahibəsində deyib ki, Laçın sərhəd-buraxılış məntəqəsində hərəkət azadlığı bloklanmayıb. 
 
İyulun 14-də Xankəndidəki erməni vətəndaşlar Azərbaycana qarşı aksiyaya başlayıblar.  Separatçı rejimin rəhbəri Araik Arturyuan  iyulun 17-də aksiyaya qoşulsa da iyulun 26-da aksiyanı dayandırdığını elan edib. 
 
İyulun 11-də Azərbaycan Dövlət Sərhəd Xidməti (DSX)  Beynəlxalq Qızıl Xaç Komitəsinin (BQXK) avtomobillərində qaçaqmalçılıq faktlarının aşkarlanmasına görə Laçın sərhəd-keçid məntəqəsini müvəqqəti olaraq dayandırıb. 

2023-cü ilin aprelin 23-də Azərbaycan Dövlət Sərhəd Xidməti Ermənistanla sərhəddə, Laçın-Xankəndi yolunun başlanğıcında sərhəd-keçid məntəqəsinin quraşdırılmasını elan edib.
 
İyunun 15-də Ermənistan silahlı qüvvələri Laçın dəhlizində Azərbaycan sərhəd-buraxılış məntəqəsini atəşə tutub. Nəticədə Dövlət Sərhəd Xidmətinin (DSX) hərbçisi yaralanıb. Azərbaycan Xarici İşlər Nazirliyi baş verən hadisəni pisləyib və "beynəlxalq ictimaiyyəti Ermənistan tərəfinin bu təxribatını qətiyyətlə pisləməyə və Ermənistanı bölgədə sülh və sabitliyə hədə olan təcavüzkar hərəkətlərdən çəkinməyə" çağırıb. 
 
Gülnar Nazimqızı