Rusiya və Azərbaycan Xəzərdəki ekoloji durumdan narahatdırlar

O həmçinin bildirib ki, dar tərkibdə keçirilən görüşdə regional təhlükəsizliklə bağlı məsələlər ətraflı müzakirə olunub.

 

"Ötən ilin sentyabrından sonra regionda tamamilə yeni vəziyyət yaranıb. Azərbaycan öz suverenliyini və ərazi bütövlüyünü tam bərpa edib. Təbii ki, yeni vəziyyət Cənubi Qafqazda möhkəm və uzunmüddətli sülhün bərqərar olması üçün yeni imkanlar açır. Bütün Cənubi Qafqaz regionunun sabitliyi və təhlükəsizliyi daha çox Rusiya ilə Azərbaycan arasında sıx qarşılıqlı fəaliyyətdən asılıdır",  -  Əliyev bildirib.

O bildirib ki, Şimal-Cənub layihəsi Bakı ilə Moskva arasında dövlətlərarası münasibətlər üçün müstəsna əhəmiyyət kəsb edir.

"Biz dövlətlərarası münasibətlərimiz üçün müstəsna əhəmiyyət kəsb edən Şimal-Cənub layihəsinin həyata keçirilməsini, eləcə də regional nəqliyyat dəhlizləri və nəqliyyat marşrutları ilə bağlı məsələləri ətraflı müzakirə etdik. Deməliyəm ki, Azərbaycan ərazisində Şimal-Cənub dəhlizinin həm dəmir yolu, həm də avtomobil seqmentləri tam icra olunub və uğurla fəaliyyət göstərir. Hazırda biz bu dəhlizin ötürücülük qabiliyyətini artırmaq üçün onun dəmir yolu hissəsini aktiv şəkildə modernləşdiririk. Söhbət ildə 15 milyon ton və ondan yuxarı yüklərin daşınması imkanından gedir", -  prezident deyib. 

Onun sözlərinə görə, Azərbaycan Rusiya ilə humanitar əməkdaşlığa həmişə xüsusi diqqət yetirib.

Dövlət başçısı xatırladıb ki, Azərbaycanda 324 rus dilində tədris olunan məktəb var ki, orada 160 minə yaxın şagird təhsil alır.

"800 mindən çox tələbə rus dilini ikinci dil kimi öyrənir. Azərbaycanın 26 ali məktəbində 15 mindən çox tələbənin təhsil aldığı rus dilində kafedralar fəaliyyət göstərir. M.V.Lomonosov adına Moskva Dövlət Universitetinin və İ.M.Seçenov adına Tibb Universitetinin filialları uğurla fəaliyyət göstərir. Və bu gün biz təhsil sahəsində əlaqələrin inkişaf etdirilməsi məsələsini də müzakirə etdik"  -  Əliyev deyib.