SOCAR ABŞ şirkəti ilə saziş imzalayıb
06.09.2024 16:35
Azərbaycan Dövlət Neft Şirkəti (SOCAR) və ABŞ-ın "Halliburton” şirkəti arasında "Texniki xidmətlərin göstərilməsi”nə dair Sazişi imzalanıb.
SOCAR-in məlumatına görə, sazişi SOCAR-ın "Azneft” İstehsalat Birliyinin baş direktoru Əli Qurbanov və "Halliburton” şirkətinin Xəzər regionu üzrə vitse-prezidenti Qrem Teylor imzalayıblar.
Sənəd Xəzər dənizin Azərbaycan sektorunda yerləşən "Günəşli” yatağında qalıq karbohidrogen potensialının yenidən qiymətləndirilməsi və qalıq neftli zonaların dəqiqləşdirilməsi üçün müasir tədqiqatların icra edilməsi məqsədi daşıyır.
Xatırladaq ki, "Günəşli” yatağı Bakı şəhərindən 120 km şərqdə, "Neft Daşları” yatağından 12 km cənub-şərqdə Xəzər dənizinin Azərbaycan sektorunda yerləşir. "Günəşli” qırışığı "Çilov-Neft Daşları” antiklinal qırışıqlıq qurşağına daxildir. Yataqda dənizin səviyyəsi 80-300 metr aralığında dəyişir. Yatağın uzunluğu 12,5 km, eni 4 km-dir.
Hazırda "Günəşli” yatağında, ümumilikdə, 370 quyu qazılıb ki, onlardan 279 quyu istismardadır. İşlənmənin əvvəlindən bu quyulardan 201,3 milyon ton neft (kondensatla birlikdə), 127 milyard m3-dən çox qaz hasil olunub.
www.anews.az
Foto 
Video 
