Rubio və Uitkoff İstanbula gedəcək

ABŞ Prezidentinin xüsusi nümayəndəsi Steven Uitkoff Dohada bildirib ki, o və Dövlət katibi Marko Rubio Ukrayna ilə bağlı danışıqlarda iştirak etmək üçün mayın 16-da İstanbula gedəcək.Bu barədə “Reuters” agentliyi məlumat yayıb.

Mayın 11-də Rusiya prezidenti Vladimir Putin İstanbulda Ukrayna ilə danışıqları ilkin şərt olmadan bərpa etməyi təklif edib və Rusiyanın danışıqlarda atəşkəs rejimini müzakirə etməyə hazır olduğunu vurğulayıb. Buna cavab olaraq Ukrayna prezidenti Vladimir Zelenski İstanbulda Putinlə görüşməyə hazır olduğunu bildirib.

Kreml Rusiya nümayəndə heyətinin mayın 15-də İstanbulda olacağını təsdiqləyib, lakin tərkibi açıqlanmayıb. Rusiya prezidentinin mətbuat katibi Dmitri Peskov iştirakçıları şərh etməkdən imtina edərək, Putinin “lazım bildiyi zaman” bunu açıqlayacağını qeyd edib.