Meksikanın İrandakı səfirliyi fəaliyyətini Bakıda davam etdirəcək

Meksikanın İrandakı səfirliyi fəaliyyətini bundan sonra müvəqqəti olaraq Bakıda davam etdirəcək. Bu barədə İrandan Azərbaycana təxliyə olunan Meksikanın İrandakı səfiri Guillermo Alejandro Puente Ordorica bildirib. Məlumatı  report yayıb.

Səfir jurnalistlərə açıqlamasında bildirib ki, Meksika hökuməti səfirliyin fəaliyyətinin Azərbaycan hökumətinin və ölkədəki Meksika səfirliyinin dəstəyi ilə Bakıda təşkil olunması barədə göstəriş verib.

“Hökumətim mənə göstəriş verib ki, səfirliyimizi Azərbaycan hökumətinin və Azərbaycanın Meksika səfirliyinin dəstəyi ilə burada yerləşdirək. Buna görə də mən və komandam buradayıq”, – deyə səfir qeyd edib.

O bildirib ki, İranda vəziyyətin mürəkkəb olması səfirliyin fəaliyyətinin müvəqqəti olaraq Bakıya köçürülməsinin əsas səbəblərindən biridir.

Səfir Azərbaycanın dost ölkə olduğunu vurğulayıb və Meksika ilə Azərbaycan arasında çox yaxşı ikitərəfli münasibətlərin mövcud olduğunu qeyd edib. Onun sözlərinə görə, o, İranda səfir olduğu müddətdə də Azərbaycana bir neçə dəfə səfər edib.

Guillermo Alejandro Puente Ordorica əlavə edib ki, o və komandası Bakıda fəaliyyət göstərərək İrandakı Meksika vətəndaşlarına dəstək verməyə davam edəcək və hazırkı vəziyyətin tezliklə sülh yolu ilə həll olunacağına ümid etdiyini bildirib.