Bir çox qurumlar gender büdcəsi ilə təhlilləri Dövlət Komitəsinə təqdim etmir

Azərbaycanda bir çox nazirlik və qurumlar gender büdcəsi ilə bağlı təhlilləri ilə, Qadın və Uşaq Problemləri üzrə Dövlət Komitəsinə təqdim etmir. Bunu Dövlət Komitəsinin sədr müavini Sədaqət Qəhrəmanova bu gün Milli Məclisdə çıxışı zamanı deyib. 

"Biz qurumlara gender büdcəsi ilə bağlı suallar ünvanlamışıq. Bu sualımıza hələ bir necə qurum cavab verib. Bəzən gender ifadəsi deyəndə elə başa düşürlər ki, oraya mütləq bir xanım təyin olunmalıdır. Gender kişi və qadınların bərabər hüquqları deməkdir", - Qəhrəmanova deyib. 

Komitənin sədr müavini bu gün hüquq-mühafizə orqanlarında qadınlarının sayının artmasını da yüksək qiymətləndirilib. 

"Baş Prokurorluqda qadınların sayının artmasını görmək olar. Hazırda Azərbaycanda 4 qadın prokuror var. Eyni zamanda qadın vəkillərin sayı da artıb. Daxili İşlər Nazirliyində də qadınların sayında 1,6%-lik artımı müşahidə edirik", - sədr müavini əlavə edib. 

Gülnar Nazimqızı