SOCAR Egey dənizindəki terminalını satmağı planlaşdırır

“SOCAR Turkiye Energy” şirkəti 2016-cı ildən fəaliyyət göstərən Egey dənizindəki neft və neft məhsullarının ötürülməsi terminalını satmağı nəzərdən keçirir.

Terminalın illik ötürmə gücü hazırda 550 min TEU təşkil edir. 2025-ci ilin əvvəlində “SOCAR Turkiye Energy”nin rəhbəri Elçin İbadov jurnalistlərə verdiyi açıqlamada terminalın 2030-cu ilə qədər 1,5 milyon TEU həcmində genişləndirilməsi imkanlarının araşdırıldığını bildirmişdi.

Lakin Türkiyə mediasının yaydığı məlumata əsasən, şirkət Əliağada yeni poliolefin – etilen, polietilen və polipropilen istehsalı kompleksinin tikintisi ilə bağlı strategiyasını dəyişib. Layihənin dəyərinin 7 milyard dollaradək ola biləcəyi qeyd olunur.

terminal SOCAR-ın 17 il əvvəl əldə etdiyi “Petkim” kimya holdinqi və 2018-ci ildə istismara verilən STAR neft emalı zavodu üçün inşa edilib. Mənbələrin bildirdiyinə görə, terminalın mümkün satış dəyəri 500 milyon dollara yaxın ola bilər. 2016-cı ildən bu günə qədər terminala yatırılan sərmayə isə 400 milyon dolları ötüb.

Bundan əlavə, SOCAR Türkiyədə qazla işləyən hibrid elektrik stansiyasının alınması imkanlarını da araşdırır. Şirkət bu stansiyaya təbii qaz tədarük etməyi planlaşdırır.

Qeyd edək ki, 2025-ci ilin əvvəlində SOCAR Türkiyədəki “Kayserigaz” və “Bursagaz” kimi qazpaylayıcı şirkətləri əhatə edən SOCAR Turkey Dogalgaz Yatirim AŞ-ni də satıb.

Ümumilikdə, son 17 il ərzində SOCAR-ın Türkiyəyə yatırdığı sərmayələr 18,5 milyard dollardan çox olub. Hazırda şirkət əsas diqqətini sənaye istehsalı layihələrinə yönəltmək niyyətindədir.

SOCAR Türkiyə məsələyə hələlik münasibət bildirməyib. 

N.Təbrizli